Rreth Nesh
Shërbimi i Kirurgjisë Vaskulare është një ndër shërbimet terciare në QSUT, unikal për gjithë vendin.
Fillimet e këtij specialiteti janë në vitet ’70 në Klinikën e Parë Kirurgjikale, kur ekipi i drejtuar nga Prof. Petrit Gaçja eksperimentoi dhe më pas praktikoi operacionet e para në Shqipëri për patologjitë kardio – vaskulare.
Nga ky ekip, në vitet ’80, u krijua njësia e parë e kirurgjisë vaskulare e përbërë nga Dr. Abdi Bala dhe Dr. Edmond Kapedani, të cilët kryen me kurajë dhe sukses një gamë të gjerë të operacioneve vaskulare.
Në vitet ’90 ekipi u rrit në numër dhe në vitin 1996 krijohet Klinika, e më pas Shërbimi i Kirurgjisë Vaskulare, me shef Prof. Edmond Kapedani, i cili me drejtimin profesional dhe pedagogjik rinovoi gradualisht stafin e kirurgëve duke bërë të mundur ndryshimin pozitiv të gamës, sasisë dhe cilësisë së trajtimeve dhe operacioneve vaskulare.
Shërbimet e Ofruara
Aktiviteti kirurgjikal i planifikuar është përqendruar tek patologjitë arteriale duke pasur përparësi aneurizmat e aortës abdominale dhe ato periferike, stenozat kritike të arterieve karotide, si dhe suklavia dhe arteriopatitë okluzive të aortës abdominale dhe të arterieve periferike.
Urgjencat vaskulare trajtohen 24 orë në 7 ditë, sepse patologji të tilla si aneurizmat e aortës abdominale të rupturuara me shok hemorragjik, ishemia akute e anësive, rupturat dhe trombozat e fistulave arterio-venoze dhe trombozat akute masive të venave të thella kanë prioritet absolut për shkak të përqindjeve të larta të ndërlikimeve dhe të vdekshmërisë.
Njëkohësisht vazhdon praktikimi i fistulave arterio-venoze primare ose me graft për hemodializë te pacientët me insuficiencë renale kronike dhe trajtimi i venave varikoze primare të ndërlikuara me tromboflebit dhe me ndryshime trofike deri në ulcera venoze.
Stafi i shërbimit është përgatitur për trajtimin endovaskular të disa patologjive arteriale, ku me përparësi janë diseksioni akut tip B i aortës torakale, këmba diabetike dhe okluzionet e shkurtra të anësive inferiore.
Oraret e vizitave nga kirurgët janë si më poshtë:
| Mjeku | Ditët | Orari |
| Dr. Petrika Gjergo | E Hënë | 10:00-13:00 |
| Dr. Denis Kosovrasti | E Martë | 10:00-13:00 |
| Prof. Asc. Edmond Nuellari | E Mërkurë | 11:00-13:00 |
| Dr. Marsela Sopiqoti | E Enjte | 10:00-13:00 |
| Prof. Sokol Xhepa | E Enjte | 10:00-13:00 |
| Dr. Albana Kenga | E Premte | 10:00-13:00 |
