Shërbimi i Onkohematologjisë Pediatrike është një njësi e specializuar brenda strukturës së PAI-t Pediatrik, e dedikuar për diagnostikimin, trajtimin dhe ndjekjen afatgjatë të fëmijëve me sëmundje beninje dhe malinje të gjakut, si dhe me tumore solide.

Ne ofrojmë kujdes multidisiplinar të personalizuar, të bazuar në standardet më të fundit të mjekësisë pediatrike, në një ambient të sigurt dhe mbështetës për fëmijët dhe familjet e tyre.

HISTORIKU I HEMATO\ONKOLOGJISE PEDIATRIKE SHQIPTARE

Hematologja Pediatrike është sektori më i vjetër në pediatri, që kur ajo nuk ishte ndarë në specialitete, i krijuar nga Prof. Selaudin Bekteshi (1956), i cili ishte në atë periudhë dhe Shefi i Shërbimit të Pediatrisë, në Spitalin e Përgjithshëm Civil.

Më pas i bashkohet dhe Prof. Afërdita Gusho, dhe me ndryshimit rrënjësor për organizimin e klinikave (1972-1975), drejtohet nga Dr. Shk. Liri Shaba, dhe stafi i saj shtohet në vite, me mjek të rinj, si: Dr. Eleni Nastas, Dr. Anila Godo, Dr. Qendro Kore, Dr. Lejla Pustina.

Në këtë shërbim u thelluan dhe u përmirësuan më tej metodat diagnostike dhe mjekuese, në përshtatje me literaturën aktuale të kohës.

Këtu përmendim trajtimin e Anemive, Trombocitopenive, Linfoadenopative, përpunimin e protokollit të mjekimit të Leukozave Akute, me futjen e erës së Citostatikëve, studimin dhe dispanserizimin e Hemoglobinopative.

Në vitin 1993, Spitali i Pediatrisë përfshihet në Spitalin e Përgjithshëm, në emrin Q.S.U.T.

Në vitin 1994, krijohet Qendra e Hemotransfuzioneve dhe e Hemoglobinopathive, me drejtuese Prof. Eleni Nastas, pjesë e rëndësishme e Shërbimit të Hematologjisë e që në 2012 iu shtua dhe Prof. Manika Kreka.

Në vitin 1996, pas kthimit nga një specializim 1 vjeҫar, në Belgjikë, të Prof. Anila Godos, Shërbimit të Hematologjisë Pediatrike, i inkuadrohet dhe ai i Onkologjisë Pediatrike (Tumoret solidë), të cilët deri atëherë trajtoheshin pranë Spitalit Onkologjik.

Në 2014, krijohet dhe Qendra e Hemofilive, që tashmë përbëhet nga një hematolog për Adultët, dhe një mjeke pediatre respektivisht Dr. Bledi Kalaja dhe Dr. Shk. Daniela Nika.

Kësaj plejade, mjekësh të nderuar, pas vitit 1998 e në vazhdim i shtohen dhe mjekët e rinj pediatër, asokohe, Prof. Asoc. Mirela Xhafa dhe Prof. Donjeta Bali, të cilat vazhduan traditën dhe sollën një frymë të re të futjes dhe të aplikimit të protokolleve europiane bashkohore të OnkoHematologjisë Pediatrike si dhe të Tumoreve të rralla.

Tradita tashmë vazhdon dhe me mjeket më të rinj Dr. Mirzana Kapllanaj, Dr. Enkeleda Duka, Dr. Besjana Dibra, kandidate për titullin “Doktor Shkencash” e që me ambicjet profesionale po trajnohen e po punojnë me përkushtim, në shërbim të fëmijëve tanë, në luftë kundër kancerit pediatrik, për të rritur mbijetesën si dhe cilësinë e jetës.

Pjesë e ekipit multidisiplinar të OnkoHematologjisë janë edhe punonjësi social (prej vitit 2003) dhe psikologu (prej vitit 2005), me qëllim mbështetjen dhe përmirësimin e funksionimit psiko-social të fëmijëve dhe familjeve të tyre përgjatë trajtimit.

Mjekët tanë janë anëtarë aktiv të organizmave të grupimeve të ndryshme shkencore e profesionale të fushës, SIOP e SIOPE, si dhe kanë marrë pjesë në konferenca e kongrese internacionale duke paraqitur e publikuar edhe në revista internacionale, me dinjitet, punime e prezantime të ndryshme mbi të dhënat e rezultatet e punës sonë të përditshme.

Pjesë e aktivitetit tonë janë dhe bashkëpunimet dhe network-et e ndryshme me organizma të ndryshëm të mirënjohur si:

• Prej Majit të 2024, ne jemi anëtar të St. Jude Global Alliance Community, Memphis, TN-USA
• Në Qershor 2024, kemi nënshkruar një Memorandum Mirëkuptimi (MoU), me Prinses Maxima Cancer Center, për trajnim ekipi multidisiplinar, që shërbejnë në funksion OnkoHematologjisë Pediatrike, hartimin e protokolleve të trajtimit, kërkimin shkencor, bashkëpunimin në diagnozën molekulare e genomike si dhe në trajtime të rasteve të komplikuara e studime klinike që nuk mund të trajtohen në vendin tonë.
• Prej Nëntorit 2024, Shqipëria është vend-fokus i GICC (Global Initiative Cancer Control) WHO/Europe
• Prej Janarit 2025, anëtar të SIOPE (Shoqatës Internacionale të Onkologjisë Pediatrike Dega Europe) - me emërtimin ALPHOG (Grupi Shqiptar i OnkoHematologjisë Pediatrike)