Fëmijët, të cilët mjekohen në shërbimet e Pediatrisë në Qendrën Spitalore Universitare “Nënë Tereza” në Tiranë dhe që do të kalojnë natën e ndërrimit të viteve në spital, kanë marrë sot dhurata nga Ministri i Shëndetësisë, Ilir Beqaj dhe nga organizata “Save the Children”.
Nën një atmosferë festive, fëmijët morën dhuratat e mundësuara nga kjo organizatë, në prani të ministrit Beqaj dhe drejtores së QSUT-së, Ogerta Manastirliu. “Dëshiroj që të gjithë fëmijët të gëzojnë në këtë periudhë festive të fundvitit, edhe këta fëmijë që për shkak të sëmundjes, nuk kanë mundësi të qëndrojnë me familjarët e tyre”, tha Beqaj.
Ministri Beqaj u shpreh më tej se këtyre fëmijëve që kanë vështirësi në ndjekjen e mësimit për shkak të marrjes së mjekimit, do t’u mundësohet marrje e njohurive në ambjentet spitalore. “Do t’u mundësojmë fëmijëve të shtruar në Onkohematologji mësues që të vijnë në spital dhe t’u mësojnë lëndët bazë, me qëllim që të mos ngelen mbrapa në mësime” tha Beqaj.
Ndërkohë, ministri i Shëndetësisë përcolli një falenderim për drejtoreshën e QSUT-së, Manastirliu, për punën e kryer në këta muaj. Ai siguroi gjithashtu se vitin e ardhshëm Pediatria dhe të gjithë shërbimet e tjera të QSUT do të kenë një furnizim më të mirë me barna.