Në Shërbimin e Kardiokirurgjisë në Qendrën Spitalore Universitare “Nënë Tereza”, janë kryer dy intervente shumë të vështira, të realizuara me sukses nga mjekët e këtij shërbimi. Falë këtyre ndërhyrjeve të kryera me emergjencë, u arrit shpëtimi i jetës së dy pacientëve të mbërritur në gjende shumë të rëndë të diagnostikuar, njëri me disekim aorte dhe pacienti tjetër me defekt interventrikular si pasojë e infarktit akut të miokardit.
Disekimi i aortës, i njohur ndryshe edhe si çarje e aortës së zemrës, është një diagnozë shumë e rrallë, por me vdekshmëri shumë të lartë. Ajo prek afërsisht 3 në 100 mijë njerëz dhe gjysma e pacientëve humbin jetën brenda 3 ditëve, nëse nuk ndërhyet. Defekti interventrikular është çarje e septumit (shtresës muskulare) që ndan dy ventikujt. Ai është një komplikacion mekanik i infarktit të miokardit, gjithashtu me vdekshmëri shumë të lartë.
Simptomat e këtyre diagnozave, kryesisht në disekimin e aortës janë dhembja në gjoks, e cila është e fortë dhe e menjëhershme. Dhembja mund të shoqërohet me vështirësi në frymëmarrje dhe mund të përhapet në shpatulla e shpinë, si pasojë e shtrirjes së disekimit.
Në Shërbimin e Kardiokirurgjisë në QSU “Nënë Tereza” raste të tilla janë të rralla. Gjatë një viti mund të paraqiten rreth 10-15 raste me disekim aorte. Ndërkohë rastet me defekt intraventrikular janë edhe më të rralla, me 2-3 raste në vit, pasi pjesa më e madhe si pasojë e rëndesës së sëmundjes, nuk arrijnë në spital ose në sallë të operacionit.
Të dyja këto ndërhyrje shumë të vështira, u realizuan në emergjencë dhe me shumë sukses nga D.SH.M Andi Kacani, mjek kardiokirurg dhe stafi i mjekëve anestezistë dhe reanimatorë të Shërbimit të Kardiokirurgjisë. Ndërhyrjet konsistuan në zëvendësimin e pjesës së çarë të aortës, në rastin me disekim aorte dhe në riparimin e septumit të zemrës me protezë dhe realizimin e by-pass për furnizimin e zemrës me gjak, në rastin e defektit ventrikular.
Për të gjithë pacientët që kalojnë ndërhyrje kaq të vështira, mjekët tanë rekomandojnë që pas operacionit, të mbahet një regjimi i shëndetshëm ushqimor dhe të ushtrohet aktivitet fizik i kujdesshëm i cili është i domosdoshëm. Më i rëndësishëm është gjithsesi parandalimi, jo vetëm i këtyre sëmundjeve por dhe i sëmundjeve bazë të tyre, të cilat janë shkaktarët kryesorë. Të sëmurët kronikë kardiakë dhe jo vetëm ata, por të gjithë njerëzit duhet të jenë të kujdesshëm me regjimin ushqimor; të jenë të kujdesshëm në trajtimin e tensionit të gjakut, diabetit dhe sigurisht duhet shmangur alkooli dhe duhani.