Në 52 javë prej fillimit te saj Urgjenca Kardiake ka pritur e trajtuar rreth 1090 pacientë, të cilët kanë marrë në kohë reale shërbim të menjëhershëm, sipas protokolleve të urgjencës së zemrës.

Këtë fundjavë, ekipi i mjekëve hemodinamistë në bashkëpunim me ekipin mjekësor të Urgjencës së Sëmundjeve të Brendshme, mundësuan mbulimin 100% të të gjitha urgjencave të pacientëve që vuajnë nga sëmundjet e zemrës, nëpërmjet procedurave të ndërhyrjeve mini-invazive në zemër.

Kështu, gjatë ditës së shtunë (24/09/2016), kanë mbërritur me urgjencë nga Tirana dhe qytete të ndryshme të Shqipërisë dhe janë trajtuar në protokoll urgjence:

– Ora 15:00 – Pacienti SH. K., 60 vjeç, Tiranë;
– Ora 20:30 – Pacientja F. GJ., 80 vjeç, Tiranë;
– Ora 20:50 – Pacienti TH. R., 64 vjeç, Durrës;
– Ora 01:50 – Pacienti A. XH., 38 vjeç, Tiranë;
– Ora 03:00 – Pacietin Th. Z., 75 vjeç, Vlorë.

Ndërkohë, ditën e dielë (25.09.2016), janë trajtuar këto raste urgjence:

– Ora 13:00 – Pacienti M. Sh., 45 vjeç, Shkodër.
– Ora ‎15:00 – Pacientja F. D., 62 vjeç, Kuçovë.
– Ora 22:30 –‎ Pacienti J.B.mosha 68, Tiranë.
Një falënderim të sinqertë për punën e palodhur, profesionalizmin dhe përkushtimin ekipit të mjekëve roje të Hemodinamikës: dr. Naltin Shuka, dr. Armand Gjana, dr. Meriton Siqeka, dr. Endri Hasimi, si dhe ekipit të mjekëve të Urgjencës së Sëmundjeve të Brendshme, dr. Lulëzim Çela, dr. Petrit Jorgji, dr. Elton Çalliku, dr. Jonida Kito, si dhe stafeve infermierore dhe teknike, në shpëtim të jetëve të pacientëve!

24 Orë Në Shërbim Urgjenca QSUT

Bashkëpunimi i ketij fondacioni me QSUT-në dhe Fakultetin e Mjekësisë, daton që prej vitit 1992. Ky ekip mjekësh profesionistë, ka lehtësuar Konferencën e parë “Mediko Kirurgjikale” si dhe ka marrë pjesë në një sërë ndërhyrjesh kirurgjikale dhe konsultash të ndryshme në shërbime klinike si kirurgjia digjestive, psikiatri, oftalmologji, duke mbështetur jo vetëm në trajnime të edukimit në vazhdim të mjekëve, por edhe duke mbështetur në aparatura mjekësore, shërbimin e kirurgjisë.

Fokusi i qëndrimit të këtij ekipi, do të jenë leksionet me studentët e Fakultetit të Mjekësisë, Infermierisë dhe Stomatologjisë, si dhe dhënia e konsulencës në Shërbimet klinike të QSUT–së duke bërë konsulta dhe vizita.

Ky ekip përbëhet nga mjekë të specialiteteve të ndryshme si: gastro-enterolog, hemato-onkologë, okulistë, pediatër endokrinolog, psikiatër, dentistë, infermierë si dhe studentë të mjekësisë.

Për ndihmesën e tyre, ata kanë marrë ndër vite 4 medalje “Mirënjohje” nga Presidenti i Republikës dhe 2 tituj “Honoris Causa” nga Universiteti i Mjekësisë.

Drejtuesi i këtij ekipi, Prof. Mark H. Johnston, mjek gastro-hepatolog, pritet të nderohet me titullin “Honoris Causa”, nga Universiteti i Mjekësisë Tiranë.

Gjatë vizitës, kryebashkiaku Veliaj shprehu gatishmërinë për të ndihmuar me projekte konkrete lehtësimin e punës në Spitalin e Pediatrisë.

“Samiri këmbënguli që të gjitha të ardhurat që u mblodhën dje nga shitja e CD-ve t’i jepte si dhuratë pranë spitalit të fëmijëve. Nëse ka një nevojë të cilën ne mund ta plotësojmë, mendoni një projekt, diçka që mund ta bëjë edhe më të lehtë punën tuaj për fëmijët. Kjo do të ishte mënyra më e mirë për të nderuar mikun tonë, si dhe për të respektuar dëshirën e tij, që këto të ardhura të shkojnë për një kauzë kaq fisnike, sa edhe puna juaj”, u shpreh Veliaj.

Tenori Saimir Pirgu vlerësoi rolin e mjekëve pediatër në trajtimin e rasteve të fëmijëve të sëmurë.

“Fuqia e mjekëve, pasi koordinoni të gjithë punën e specialistëve të tjerë, dhe buzëqeshja juaj çdo mëngjes, janë gjëja kryesore për fëmijët dhe për prindërit”, tha Pirgu.

Drejtoresha e Qendrës Spitalore Universitare “Nënë Tereza”, Ogerta Manastirliu, u shpreh se ky dhurim është një akt solidariteti për t’u bërë të gjithë bashkë.

“Dua të falenderoj, jo vetëm për kontributin financiar, por për aktin, i cili është shumë inkurajues, padyshim shumë i rëndësishëm për spitalin pediatrik”, tha ajo, duke theksuar se shumë shpejt do të ngrihet rrjeti i fëmijëve të spitalit pediatrik dhe ftoi tenorin Pirgu që të jetë pjesë e kësaj kauze.

Koncerti i tenorit të mirënjohur shqiptar, Saimir Pirgu, në Teatrin e Operës dhe Baletit ishte pjesë e turit “Il mio canto”, i cili pati mbështetjen e Bashkisë së Tiranës. Ky koncert është pjesë e turit botëror të këtij artisti në qytet më të mëdha të botës si: Firenze, Vjenë, Paris, Berlin, Nju Jork, Moskë, Tokio.

Ky Komision miratoi krijimin e Komitetit për Kontrollin e Infeksioneve Spitalore për vitin 2016, një strukturë e rëndësishme teknike, përgjegjëse për parandalimin dhe uljen e infeksioneve spitalore. Përbërja, fuqizimi dhe rivlerësimi i tij për të përftuar një komitet aktiv në gjendje të mirëpërcaktojë një strategji apo plan veprimi për vitin 2016 me objektiva konkrete dhe të matshme, politika të qarta për parandalimin dhe uljen e infeksioneve spitalore si dhe planin e punës për trajnimin dhe edukimin në vazhdim të stafit mjekësor dhe infermieror për kontrollin e infeksioneve spitalore në shërbimet mjekësore të QSUT.

Kontributi i anëtarëve të Komisionit, analiza dhe propozimet e tyre u ndalën në çështje të tjera në axhendë siç ishin aprovimi i listës së mjekëve konsulentë në shërbimet e QSUT, propozimet për rifresikimin e Komisionit Ndërspitalor dhe problematikat në Urgjencën e Sëmundjeve të Brendshme.

Në vijim të këtij bashkëpunimi, gjatë periudhës 16-18 shkurt 2016 janë kryer disa aktivitete ndërgjegjësuese dhe edukuese mbi mënyrat e kontrollit dhe parandalimit të infeksioneve nozokomiale. Ekipi i përbërë nga 3 specialistë me eksperiencë në fushën e parandalimit dhe kontrollit të infeksioneve, në bashkëpunim me Njësinë e Kontrollit të Infeksioneve Spitalore në QSUT, arriti të kryejë disa seanca trajnuese në shërbime të ndryshme të QSUT.

Konkretisht u trajnuan:

• ekipi i Njësisë së Kontrollit të Infeksioneve Spitalore mbi praktikat më të rekomanduara të punës në këtë njësi. Ekipet shkëmbyen eksperiencën e tyre dhe diskutuan mbi protokollet e punës;
• ekipi i Reanimacionit Qendror mbi mënyrën e parandalimit të infeksioneve spitalore gjatë aplikimit të kateterëve venozë qendrorë;
• ekipi i Njësisë së Dializës në QSUT mbi parandalimin e infeksioneve spitalore tek pacientët dializantë në përgjithësi dhe veçanërisht gjatë aplikimit të kateterëve venozë qendrorë dhe periferikë tek këta pacientë.

Një trajnim mjaft interesant ishte edhe ai i kryer në sallën e Telemjekësisë me temë “Rëndësia dhe bazat e higjienës së duarve në shërbimin e ofruar ndaj pacientit” ku morën pjesë mbi 80 pjesëmarrës.

Në bashkëpunim me Njësinë e Kontrollit të Infeksioneve Spitalore, në ditët në vijim, trajnimet u përsëritën edhe në Urgjencën Polivalente në QSUT, në spitalin Infektiv dhe atë Onkologjik. Më tej në hollet e këtyre spitaleve u zhvillua një fushatë sensibilizuese mbi teknikat e higjienës së duarve dhe 5 momentet kur ajo duhet të kryhet. Fushata bazohej në këshillimin e personelit, monitorimin e kryerjes korrekte të teknikave, si dhe shpërndarjen e materialeve sensibilizuese dhe edukuese.

Sot, në ditën botërore të parandalimit të kancerit, e cila këtë vit vjen me mesazhin kuptimplotë “Unë mundem, ju mundeni”, Qendra Spitalore Universitare “Nënë Tereza” në Tiranë, ofron për pacientët e Onkologjisë, njësinë e radioterapisë, tërësisht të rikonstruktuar.

Akseleratori i parë Linear është instaluar, si aparaturë e teknologjisë së fundit bashkëkohore për trajtimin multidisiplinar me preçizion të lartë të tumoreve. Ai është investim me vlerë 315 milion lekë, i mundësuar nga kredia austriake.

Akseleratori është i vendosur në godinën e re (bunkerin me kapacitet dy njësi) investim i qeverisë  me vlerë rreth 260 milion lekë, në të cilën vitin e ardhshëm pritet të vendoset një tjetër akselerator.

Me këtë investim të rëndësishëm, QSUT do të përmirësojë ndjeshëm trajtimin me radioterapi të pacientëve me sëmundje tumorale, nga ku do të përfitojnë rreth 60 pacientë në ditë dhe rreth 640 pacientë në vit.

Në dy vitet e fundit, një vëmendje e veçantë i është kushtuar masave parandaluese dhe zbulimit të hershëm të sëmundjeve tumorale. Kështu, gjatë vitit 2015, dy njësi lëvizëse të mamografisë realizuan falas 4800 ekzaminime parandaluese për gratë që jetojnë në zona ku pranë vendbanimit nuk ka mamografi stacionare. Ndërsa, në të gjitha pikat ku ka mamografi stacionare, për vitin 2014 u kryen 3317 ekzaminime parandaluese. Po kështu mjekë të rinj, të specializuar në këtë fushë, po iu shtohen stafeve mjekësore të spitaleve në të gjithë vendin.

Kryeministri Edi Rama, i shoqëruar nga Ministri i Shëndetësisë Ilir Beqaj, ishte sot në QSUT. Ai u takua me drejtues të Qendrës, si dhe me grupin e mjekëve onkologë dhe fizikantëve mjekësorë, të cilët mundësuan vënien në funksionim të Akseleratorit Linear.

Drejtoresha e Qendrës Spitalore Universitare “Nënë Tereza”, Ogerta Manastirliu, theksoi se kabineti i ri i radioterapisë është investimi më i rëndësishëm për QSUT dhe bëri të ditur se në fillim të marsit do të nisë trajtimi i parë me radioterapi. “Është investimi më i rëndësishëm për shërbimin onkologjik, një investim i financuar nga qeveria shqiptare në vlerën 260 milion lekë, sa i përket ndërtimit të hapësirave për pritjen e akseleratorit linear. Gjithashtu falë kredisë austriake, qeveria shqiptare ka financuar akseleratorin linear, një pajisje e teknologjisë së fjalës së fundit, e cila trajton me radioterapi gjithë pacientët, të cilët janë të disgnostifikuar me tumore malinje.  Në këtë njësi radioterapie, ne mund të trajtojmë rreth 640 pacientë në vit dhe mund të bëhen rreth 60 procedura terapeutike në ditë. Është një qendër, e cila do të funksionojë falë edhe një ekipi multidisiplinar, falë fizikantëve mjekësor të cilët aktualisht po kolaudojnë këtë pajisje dhe besojmë që në fillim të marsit do të kemi trajtimin e parë me radioterapi.”

Shefi i Shërbimit të Onkologjisë u shpreh se struktura e rinovuar e radioterapisë, do të përmirësojë ndjeshëm shërbimin ndaj këtyre pacientëve. “E shikoni që është një infrastrukturë goxha e përmirësuar. Një aparaturë dhe një strukturë, tërësisht e rinovuar që do çojë përpara standardet  e mjekimit të pacientëve tanë në onkologji. Ky është  një lajm i  mirë për të gjithë ne, pacientët dhe familjarët e tyre.”

Duke theksuar angazhimin e qeverisë, në parandalimin e sëmundjeve tumorale, Ministri i Shëndetësisë Ilir Beqaj u shpreh se qendra moderne e radioterapisë është në vijim të përmbushjes së këtyre angazhimeve. “Jemi angazhuar që sëmundjet tumorale do të kenë fokus të veçantë dhe sigurisht kjo qendër e re e radioterapisë moderne, është në vijim të përmbushjes së këtyre angazhimeve. Sot, simbolikisht, zgjodhëm këtë ditë, pasi 4 shkurti është dita botërore në luftën kundër kancerit. Në këto dy vjet e gjysmë, ne kemi bërë përpjekje jo të pakta, pavarësisht se jemi të vetëdijshëm që duhet edhe më shumë, për të rritur ndjeshëm shërbimin për këto sëmundje. Nga data 1 shkurt, mamografia është falas për këdo, në çdo lloj rrethane dhe nuk ka qenë kështu më parë. Ky investim prej 600 milion është në ndihmë  të qytetarëve shqiptarë.” – u shpreh ministri Beqaj.

Duke falënderuar për punën e bërë, Kryeministri Edi Rama, u shpreh se standardet moderne bashkëkohore  do të synohen në të gjithë institucionet shëndetësore në vend, jo vetëm për të përmirësuar shërbimin ndaj pacientëve, por dhe për të krijuar kushte optimale që mjekët të ushtrojnë profesionin e tyre human.

“Po tentohen standardet më të mira dhe më bashkëkohore, për ti dhënë mundësi mjekëve që të zhvillojnë vetveten si profesionistë, në kushte sa më të përafërta me kushtet që kanë kolegët e tyre jashtë Shqipërisë. Kjo qendër, për vite të tëra nuk ka qenë fare një qendër spitalore universitare, por ka qenë në të njëjtën kohë dhe spitali i gjithë Shqipërisë. Synimi është që të shpërndahet barra dhe të kemi disa nivele. Mendoj që check up-i do të vazhdojë të japë të dhëna dhe të ndihmojë që të krijojmë një bazë të parë. Mendoj që shërbimi tanimë këtë vit falas, tek mjeku i familjes është një tjetër kusht i mirë, por që ka ende nevojë të përforcohet, duke ndihmuar edukimin në vazhdim të mjekëve të familjes, duke stimuluar sistemin e mjekut të familjes, përmes investimeve edhe aty. Sigurisht, pastaj përtej spitaleve rajonaleve, kjo qendër nuk ka pse të mos jetë një qendër ekselence.  Ky është edhe synimi për disa pjesë të tjera të QSUT-së, që janë ende aty ku ishte ky repart përpara këtij transformimi. Do t’ia dalim. Plani është i qartë, hapat dihet se cilat janë. Nuk na mungon as dëshira dhe as kuraja. Por mbi të gjitha, përsëri e them këtë gjë, me bindje, jo formalisht, keni një bazë të mirë ku të mbështeteni, tek burimet njerëzore.” – tha Kryeministri.

Kanë kaluar tashmë dhjetë vite nga vizitat dhe ndërhyrjet e para të planifikuara në shërbimin e Kardiokirurgjisë së QSUT “Nënë Tereza” të ekipit të mirënjohur drejtuar nga Prof. Vittorio Vanini, një kardiokiurg pediatër i shquar në fushën e tij, ç’ka është mundësuar nga fondacioni “The Heart of Children”. Ky ekip i mbështetur edhe nga kardiokirurget e subspecializuar te QSUT ka operuar dhjetëra raste tejet të vështira duke shpëtuar jetë fëmijësh të cilët janë dëshmija e gjallë e profesionalizmit dhe mundit të këtij ekipi të përbashkët.

Në kuadrin e një bashkëpunimi mes QSUT dhe fondacionit “The Heart of Children” me qendër në Milano, Prof. Vanini me ekipin e tij, përgjatë gjithë kësaj periudhe ka asistuar mjekët kardiologë, kardiokirurgë dhe kardiopediatër së bashku me stafin infermieror, për të kryer vizita mjekësore, intervente, kateterizime për fëmijët shqiptarë me probleme të lindura të zemrës. Ky bashkëpunim prej një dekade ka çuar në zhvillimin e mëtejshëm të kardiokirurgjisë pediatrike në vendin tonë duke mundësuar që pacientët e vegjël të mos shkojnë për tu kuruar jashtë vendit.

Sot kardiokirurgjia pediatrike shqiptare është në gjendje të zgjidhë shumicën e problemeve të lindura të zemrës në mosha të vogla, kjo falë dhe investimeve të rëndësishme (aparatura dhe materiale të nevojshme mjekësore) të bëra këto dy vitet e fundit në shërbimin e Kardiokirurgjisë nga Ministria e Shëndetësisë në kuadër të përmirësimit të mëtejshëm të cilësisë së shërbimit mjekësor edhe në këtë fushë.

Dhjetë fëmijë me probleme të lindura të zemrës (anomali kongenitale) si: Koartacion aorte, Defekt interventrikular, Tetralogji Fallot, Ventrikul i djathtë me dalje të dyfishtë, Kanal Atrio-ventrikular komplet, janë operuar gjatë kësaj jave në shërbimin e Kardiokirurgjisë në Qendrën Spitalore Universitare “Nënë Tereza” në Tiranë, nga mjekë të këtij shërbimi nën asistencën e kardiokirurgëve italianë të shoqatës “The Heart of Children” të kryesuar nga Prof. Vittorio Vanini.

Për herë të parë, një mjek shqiptar hemodinamist pediatër i QSUT ka realizuar katër ndërhyrje tek fëmijët me patologji kardiake të lindura në sallat e Hemodinamikës, ku është kryer me sukses dilatacioni me ballon i stenozës së arteries pulmonare.

Gjithashtu ekipi i përbashkët i Prof. Vaninit dhe kardiokirurgëve shqiptarë kanë kryer 50 vizita ambulatore në QSUT të fëmijëve neonatë me probleme të lindura të zemrës, të cilët janë operuar apo do të operohen nga stafi mjekësor.

Kabineti i hemodinamikës në shërbimin e kardiologji/kardiokirurgjisë në Qendrën Spitalore Universitare “Nënë Tereza” në kryeqytet ka tashmë një aparat të ri angiografie. Lajmi u bë i ditur gjatë vizitës që Ministri i Shëndetësisë, z. Ilir Beqaj, zhvilloi sot në këtë institucion me rastin e vënies në punë të kesaj pajisjeje për diagnostikimin dhe trajtimin e sëmundjeve kardio-vaskulare.

Instalimi i kësaj pajisjeje të teknologjisë moderne e bashkëkohore, do të mundësojë që brenda muajit tetor nëse një pacient do të ketë nevojë të bëjë një koronarografi në shërbimin publik, do të mund ta bëjë atë edhe nëse paraqitet gjatë natës, ndonëse deri më tani ky ekzaminim në orët e vona, ofrohej vetëm në spitalet private, u shpreh Ministri Beqaj në takim.

Në fjalën e tij për të pranishmit, kreu i shëndetësisë tha midis të tjerash se “gjithçka kemi këtu me pajisjet, me mjekët, me personelin janë një bazë e mirë që brenda muajit tetor të kemi këtë shërbim 24 orë në shtatë ditë të javës”, duke shpjeguar se përveç investimit për pajisje të reja bio-mjekësore, është shtuar edhe numri i personelit shëndetësor në shërbimin e hemodinamikës, si pjesë e nismës së ministrisë së shëndetësisë për rritjen dhe përmirësimin e cilësisë së shërbimit në institucionet publike të ofrimit të kujdesit shëndetësor.

Ndërsa znj. Ogerta Manastirliu, drejtore e QSUT-së, shtoi se, “nga viti 2013, 6-mujori i parë në vitin 2015, 6-mujorin e parë është rritur me rreth 50% numri i koronarografive të zhvilluara në qendrën tonë spitalore, në kabinetin e Hemodinamikës, ndërkohë që është 24% më shumë se viti 2014”.

Sipas Prof. Dr. Artan Goda, shef i shërbimit të kardiologjisë, “vënia në punë e kësaj pajisjeje, së bashku me një furnizim më të mirë të materialeve të konsumit, ka bërë të mundur që qëndra jonë QSUT të kthehet në një nga qëndrat më të mëdha në gjithë rajonin, përsa i përket numrave, duke e shndërruar tashmë këtë shërbim në qendrën më të madhe të këtij specialiteti në rajon”.

Ky investim vjen menjëherë pas vënies në punë për herë të parë përveç QSUT-së, të qendrës së dytë publike të specializuar të hemodinamikës në vend në Spitalin Universitar “Shefqet Ndroqi” në fillim të këtij muaji. Gjithashtu, me Aktin Normativ të Këshillit të Ministrave të miratuar më 29 korrik 2015 lidhur me shtesën e buxhetit për investimet e reja në shëndetësi, janë dhënë financime të rëndësishme dhe pajisje diagnostike për sëmundjet e brendshme që do të vihen në funksionim në fillim të vitit të ardhshëm duke i zgjeruar ndjeshëm mundësitë për ofrimin e këtij shërbimi në institucionet tona publike, të financuara me paratë publike.

Në vijim fjala e plotë e Ministrit Beqaj, znj. Manastirliu dhe Prof. Dr. A. Godës në takim.

Z. Ilir Beqaj, Ministër i Shëndetësisë:

Unë besoj se falë lidershipit të Profesor Godës, falë administrimit shembullor të drejtorisë së spitalit, ne ia kemi dalë që brenda dy vjetësh të rrisim ndjeshëm kapacitetet për këtë shërbim jashtëzakonisht të rëndësishëm për jetën e qytetarëve.

Praktikisht sot, ne bëmë një vizitë inspektuese për një pajisje të re, e cila është vënë në punë rreth 2 muaj, dhe që zëvendësoi një pajisje që ishte vënë në punë që nga viti 1996 dhe që praktikisht ishte amortizuar, por edhe nuk kryente teknika që janë sot moderne.

Sigurisht, që pajisjet sot po i shtojmë; ia kemi dalë t’i sigurojmë një mirëmbajtje shumë më të mirë; për të garantuar vijimësi në funksionimin e tyre, kemi shtuar furnizimin me materiale mjekësore të domosdoshme për të kryer këto ndërhyrje; dhe nëse marrim në konsideratë volumin e shtuar të punës në QSUT, kemi 2 poste pune që punojnë në QSUT deri rreth orës 20:00 të darkës.

Me ato çka kemi financuar që nga janari në institucionet jopublike për këto ndërhyrje dhe me ato që filluam para disa ditësh në Spitalin Universitar “Shefqet Ndroqi”, ne këtë vit e dyfishojmë volumin e financuar me paratë publike për këto ndërhyrje shumë të rëndësishme, jetëshpëtuese, si edhe shkurtuese të invaliditetit, por ruajtjes së cilësisë së jetës.

Sigurisht që, ajo çfarë kemi sot këtu me pajisjet, me mjekët, me personelin, furnizimin, janë bazë e mirë që ne të synojmë, që brenda muajit tetor, të fillojmë për herë të parë në Shqipëri, të kemi këtë shërbim 24 orë në 7 ditë të javës.

Unë besoj se, ajo çfarë kemi arritur deri më sot, nga para dy vjetësh, nëse rardha e pritjes për këtë shërbim me para publike, ishte 7 muaj, sot e kemi brenda 3 muajve, është një afat i mirë, i pranueshëm edhe në nivele krahasuese me vendet e rajonit, por besoj se kur të jetë 24 orësh, do të jetë një stad i ri shumë më cilësor në ofrimin e këtij shërbimi.

Sigurisht, edhe në QSUT në vite kemi bërë disa investime, por ato më të mëdhatë priten të fillojnë. Është bërë operative fillimi i kredisë së CEB-it, për të rikonstruktuar në mënyrë radikale këtë spital, i cili praktikisht në vite na ka sjellë një godinë të amortizuar.

Znj. Ogerta Manastirliu, Drejtore e QSUT:

Në shërbimin e kardiologjisë, në kabinetin e hemodinamikës, instalohet një pajisje e re angiografike në kuadër të gjithë strategjisë tonë për përmirësimin e shërbimeve mjekësore në QSUT. Kjo pajisje përçon një standart të ri sa i përket përmirësimit të cilësisë të shërbimeve të ofruara për pacientët tanë.

Mund të them këtu disa shifra: Që nga viti 2013 6-mujori i parë, në vitin 2015 6-mujori i parë, është rritur me rreth 50% numri i koronarografive të zhvilluara në qendrën tonë spitalore në kabinetin e hemodinamikës, ndërkohë që janë kryer rreth 24% më shumë se në vitin 2014. Sigurisht, që kjo pajisje e re që është instaluar në këtë kabinet, garanton një shërbim më të mirë për pacientët dhe ne garantojmë një furnizim më të mirë të materialeve mjekësore, që kjo pajisje duhet të përdoret në mënyrë më efiçente dhe sigurisht furnizim të vazhdueshëm edhe me barna e materiale mjekësore në përgjithësi.

I hapim rrugën shërbimit 24-orë të hemodinamikës, sigurisht edhe me mbështetjen me kapacitete njerëzore, me mjekë të rinj, në kuadër të mbledhjes të fundit të bordit, ku në shërbimin e hemodinamikës, shtohen 4 mjekë kardiologë hemodinamistë për këtë shërbim.

Prof. Dr. Artan Goda, Shef i Shërbimit të Kardiologjisë:

Ky është një investim në vazhdën e investimeve të tjera që janë bërë në këtë fushë, të cilat së bashku me furnizimin më të mirë të materialeve të konsumit, kanë bërë të mundur që Qendra Spitalore Universitare “Nënë Tereza”, në qendrën intervencionuese, të jetë qendra më e madhe e rajonit për sa i përket numrave, dhe është një mundësi për t’u thelluar në ndërhyrje më të ndërlikuara dhe për ta shtrirë shërbimin përgjatë gjithë 24-orëshit.